10- رد فعل غير متوقع

أن إكسبكتد ريآكشن ,, ييس إن دييد , مشكلتي اني ما اعرف امسك لساني , احسد الناس اللي عندهم القدرة دي , احس في شي ياكلني لمن اكون كاتم شي في قلبي , اعرف واحد راح الصين و ما عرفت الا لمن رجع! , والله لو انا , كان نص جدة عرفت اني مسافر الطايف حتى , الشي دا على مستوى العيله عندنا , ما نحب ندُس , بينما اعمامي مثلاً العكس , نتفاجئ مثلاً فلان جي بسيارة جديدة , ولا نقلوا بيت جديد , ولا وت إيفر , بينما نحنا بشكل عام لازم نحكي قبل لا نسوي اي تصرف , غالباً بحكم المشورة , اظن قضاء الحوائج بالكتمان أفضل

.................

اللي جاب السيرة اني اليوم كنت مع الماما في جلسة صفا , و طول عمري ما ادخل في مشاكل الا من لساني في ساعات الصفا , قلت لماما عندي حكاية حلوة , عاد حكيتها بإختصار اني تقريباً خلاص لقيت البنت إياها اللي شفناها داك اليوم , و باقي تكة واجيب عنوان بيتها خلاص , فــُـرجت يا ماما فــُـرجت, عاد انا متحمس , و متوقع رد فعل حماسي و لكن واخيبتاه

.................

اظن امي ما تتوقع مني التصرف دا , اني اشوف وحده و تعجبني و اجلس ادور عليها و اتحمس , لا و ما تدري اني جلست الفلف في الحيّ يا حليلي بس , ما بيننا هروج زي كدا اساساً , بحكم ان الاشياء دي عيب , و بدأت افتراضات التحطيم , و كان الحوار لطيف بيني و بينها

ــ ايش هادا ليش السياره بإسم امها

ـ> يمكن امّها مقتدره

ــ و التلفون برضو بإسم امها , عسى ابوها ميت؟

ـ> الله يرحمنا و يرحمه , طيب و ايش يعني؟

ــ لالا عسى مطلقة امها كمان! , ويّيّيّ يا ولدي

ـ> وه يا ماما! , حتى لو افترضنا و ايش يعني! , احنا نسأل عن الاوادم و اخلاقهم مالنا و مال الباقي

ــ طب و الاوادم اللي كلمناهم , والله انا قلبي منشرحلهم , مو عيب نخصرهم؟؟؟؟؟؟؟

.................

هنا صراحة انا وقفت , فعلاً عيب ما يسير , صحيح اني ما شفتها ولا امي حتى ما راحت شافت بنت الناس , بس احس اخلاقياً ما يسير , كأني العب على الحبلين اذا هادي ما زبطت التانية تزبط , احصائياً و تحليلياً التصرف صحيح بس اخلاقياً ما يسير اعتقد , يوووه , الحل اني الاقي بيتهم و نلحق نعرف من بيت مين و نسأل عنهم قبل ما امي تروح تزور الاوادم التانيين , هل ممكن! , ما اعتقد

.................

الحل التاني , امي تتصل على رقم الهاتف الثابت اللي طلعته من الانترنت , و تتصل عليهم مباشرة , و تسألهم بطريقته محترمة و زوق سمعنا عندكم بنت هل تبغو تجوزوها ولا لا يسير نعرف من البداية , مو يمكن الآدمية صغيره لسه او عندهم اي عذر تاني , اصلاً مو يمكن يطلعو ناس تانيين مو هما اللي شفناهم اصلاً ! , كل شي جايز , الله يقدّر اللي فيه الخير , انا قايم استعد لصلاة العيد , و راح أسوي دُعى , كل سنة و المسلمين و غير المسلمين و ذات الوشاح الأبيض بخير

.................

و للحديث بقية