3- الحل الأول

ملاحظة: اليوم راح اكتب بالعامية

ملخص: كان الحل الاول باختصار عند المرور , شخص ما يعرف شخص ما اخر يدخل على الداتابيس و يجيب اسم صاحب السيارة من رقم اللوحة اللي لقطته اثناء ابتعاد السيارة

...............

في بلدان اخرى يعتبر حل خرافي , ناس ماسكة مناصب تحترم نفسها ما تسرّب معلومات

بس عندنا العملية سايبه شوية و يعتبر الحل سهل و منطقي , خصوصيات الناس مالها اي قيمة , اذا تعرف اي موظف بإصغر مرتبة في اي قطاع , يقدر يجبلك اصله و فصله , في الهاتف مثلاً شخص يضايقك مثلاً , او وحده تبغى تضايقها , عادي مافيش مشاكل , المهم حالياً اني اجيب رقم لوحة السيارة بأي ثمن حتى لو بطرق ملتويه

...............

اول شخص فكرت فيه يقدر يساعدني هو معقب اتعامل معاه من وقت لوقت , اسمه محمد , ولد نشمي و خدوم , و اعتقد انه يقدر يسويها , عنده شبكة علاقات مع معقبين لديهم شبكات علاقات أخرى لا بأس بها , ولو عرضت عليه مبلغ مكافأه كبير شوية من باب التحفيز عشان يتحمّس

..............

و فعلاً قررت امس اني اتصل عليه و انا راجع من الدوام , بس ايش اقله؟! , في بنت عجبتني خد رقم لوحة سيارتهم جبلي اسمها؟ , مو منطق , شكلي حيسير بايخ قدامو حتى لو نيّتي طيبة , طيب اقلو خد رقم اللوحة و ابغاك تجبلي بإسم مين و ما اقله اي تفاصيل؟ , ما اظنه راح يقول لأ! , بس شكلي حيسير اوحش من اول , حيبدأ الفار يلعب مدري فين عندو , يحسبني ابغا انتقم من شخص ولا عندي مصيبة! , ما ينفع , بعد تفكير و تمحيص , قلت اقله اني ابغاه يجبلي رقم اللوحة و اقله يشهد الله انها لغرض خير و بعد ما يتم الموضوع راح اقلك التفاصيل , و على العموم راح يصدقني لاني مو معروف عني اني راعي مشاكل

..................

والله و فعلاً مسكت الجوال و دخلت على كونتاكتس , و ضغط على حرف الإم! , و يطلعلي اسمه , و نزل عليا تردد عجيب , بصراحة استحيت , برضي مو مقتنع باللي اقوله , بعدين دفعة من الحماس جاتني , و قلت يالله يا شيخ , اتوكل على الله بس طالما نيّتك طيبه حتتيسر انشالله , و ارجع لحرف الإم و اضغط على السماعة الخضرا , و يجيني الصوت الحنون , إن الهاتف المطلوب لا يمكن الاتصال به الآن

......

عمى

......

قلت الصباح رباح , بكره يحلها حلال , نشوف اليوم انشالله يرد

......

و للحديث بقية