4- برنت المرور

ملاحظة: فيما يبدو أني كل يوم راح اكتب بالعاميّة , الفصحى تحتاج تنقيح و تهذيب يستهلك مني وقت طويل

ملخص ما سبق: قررت اكلم محمد المعقب قلت اكيد يعرف ناس من هنا ولا من هنا في المرور يشفلي رقم لوحة سيارة جميلة جرير مول , و بعد تردد و اخذ و عطا بين النفسين اللوّامة و الأمارة بالسوء قررت اني اتصل , انتصرت احداهما و قررت اني اتصل , اتصلت و كان الجوال مقفل

................

كتبت الجزء السابق الساعة 2 ظهراً وقت الـ لنش-بريك في الدوام , و في الطريق للبيت رجعت شجعت نفسي و اتصلت على محمد , قلتله بعد السلام و رد السلام , قلتله يا ابن الحلال ابغاك في خدمة انسانية جليلة , قلي لبيه , قلتله شوف قبل لا اقلك الخدمة احب اوضحلك انه موضوع فيه خير و مافيه أي نوع من انواع الشرور , قلي اتفضل يا سيدي تحت امرك , قلتله الموضوع باختصار عندي رقم لوحة سيارة و ابغى اعرف لمين هل راح تقدر تسويها ولا لأ , قلتله ترى ما اعرف احد غيرك يعني اذا انتا ما سويتها ما اظن اني راح اسعى في الموضوع , قلي لااااااا أبشر الموضوع مااااارررره سهل

................

قلي اسحبلك برنت من المرور فيه كل التفاصيل حتى موقع السكن , قلت بس هوا دا المطلوب يالله شد حيلك , قلي بس ,, اخخ جينا للبسبسة , قلي دحين الموظفين كلهم في اجازة الحج ما راح الاقي احد غالباً , قلتله عاد خد وقتك , مع اني عارف انو ما عندي وقت لاني سامع امي بتتكلم على بنت تانية شافتها او ناس دلونا عليهم , حاولت اشرحله اني اسابق الساعه , بس قلت نصيب خلاص ومالو

...............

و للحديث بقية