5- Good And Bad News
آخر شي وصلناله ان المعقب محمد قلي ان الموضوع سهل بس دحين ما يقدر عشان إجازة الحج بدأت , قلتله خلاص تيك يور تايم , بس لا تنسانا
.............
الكلام دا كان يوم الثلاثاء مساءً الساعة 7 , والله و اليوم الساعة 3 عصراً تقريباً لقيت مسج من محمد يقلي كلمني , اتصلت عليه و بعد سلام و سؤال عن الاهل و الاخوان لمدة سبعة دقائق و اعادة نفس الاسئلة عن الاهل و الاخوان سبعة دقائق اخرى قلي ابشرّك , ترى لقيت صاحبي اللي اعرفه في المرور ما اخد اجازة , و جبتلك كل معلومات السيارة
.............
يا سلااااااام على الفرحة اللي اجتاحتني في تلك اللحظة , و بدأت افكر ان الموضوع كان حياخد شهر ولا شهرين على الاقل و سبحان الله انحل في اقل من اسبوع و بدأت اعيش في خيالي اني خلاص خطبتها و جالسين نخطط لحياتنا في تبات و نبات , و قبل ما اتمادى في الخيال قلي بس ترى السيارة باسم شركة تأجير مو بإسم شخص
.............
انواع الاكتئاب , و طار الخيال اللي اتخيلته كله , و على طول اتخيلت نفسي متجوز وحده تخينة عندها شامة كبيرة في خدها و تصرخ , و لسانها طويل , و اني تعيس في حياتي الزوجية عشان ما لقيت فتاة احلامي , و بدأ الخيال المضاد يسحبني معاه , قلت خلاص عاد السيارة طلعت بالإيجار مافي داعي نجلس نسوي المحقق كونان و نجلس نجري في شركات التأجير , قلت لحد كدا و كفاية راح اشوف الحلول الأخرى حتى لو اضطريت الف الحيّ اللي حولين جرير مول شارع شارع
.............
و في غمرة الاحساس بالإحباط و اليأس فاجأني بخبر آخر , قلي لالا السياره مو ايجار , قلتله اجل ايش؟؟!!؟ , قلي السيارة ملك بإسم شركة اسمها تأجير , شركة ضخمة و معروفه تشتري سيارات و تبيعها بالتقسيط على الناس , و قال بعدها جملة من اجمل ما سمعت , قال انه يعرف ثلاثه مدري اربعة يشتغلوا في الشركة و راح يحاول يجبلي معلومات
.............
من قمة الأمل الى قمة اليأس الى الأمل مرة اخرى , على طول طبعاً المتينة ام شامة طلقتها من خيالي و عاد قفصي الذهبي خالياً في انتظار المحبوب
.............
طيب يا سيدي حاول تتصرف , قلتله على فكرة ترى اذا احد طلب منك فلوس او شي ادفعله انا اتحاسب معاك بعدين , قلي ابشر مافي مشاكل , و حسيت في صوته تردد و جلس يقلي الناس تسألني ايش تبغى بإسم صاحب السيارة و ما اعرف ايه و مدري ايه و ما عرفت ايش اقلهم , بس يعني اذا تأكدلي انه عمل خير , قلتله يا سيدي الهرجة ببساطة اني كنت مع الوالدة و شفت وحده عجبتني و جالس ادور عليها ابغى اعرف اسم اهلها , عاد انبسط الآدمي و قلي السيارة بكبرها اجبلك هيا مو بس اسم الرجال , قلتلو عاد انا قلتلك موضوع خير انشالله , قلي احلى خير والله
.............
و حالياً جالس مستنيه يروح يسأل شركة تأجير , و بعدين عرفت ان الشركة مقرها في نفس مقر عملي , بيني و بينهم ستة ادوار , ستة أدوار تفصل بيني و بين ,,,,,,, ذات الوشاح الأبيض , الله يسهّل
.............
و للحديث بقية
posted by إبراهيم at
4:24 PM
2 Comments:
the web link to this page from the home page is broken. you may consider this
http://ibrahimyat.blogspot.com/2006/01/5-good-bad-news.html
instead of
http://ibrahimyat.blogspot.com/2006/01/5-good-news-bad-news.html
By
Anonymous, at 11:20 PM
Very nice site! »
By
Anonymous, at 4:45 AM
Post a Comment
<< Home