6- تــيــت تــيــت

نغمة مسج نوكيا المميزة , من أكثر الاصوات المحببة إلى قلبي , مدري انا لحالي و لا في كتير ناس زيي , الثواني اللي تفصل بين صوت المسج و اني افتحه و اقراه , احس بحماس عنيف , أنواع الأدرينالين , بينما غالباً اكره الاتصالات خصوصاً لو من ارقام غريبة , خصوصاً اذا وصلت رنّة وحده , ما أحس بخير ابداً , و للناس فيما يعشقون مذاهبُ

..............

كان اليوم أربعاء و الساعة تقريباً العاشرة مساءً , جاني المسج و طلع من محمد المعقب , الادمي دا ما شاء الله عليه مو طبيعي فعلاً , لولا انه مو سعودي كان قلت انه دبّوس آز نوون آز مباحث , لقيت في المسج اسم , نعم وصل ألإسم , إسم صاحب السيارة , وصلّه عن طريق صاحبه اللي في شركة تأجير وصل للمعلومات اللي يحتاجها , بسرعه اذهلتني صراحة

..............

حتى الآن كل شي يبدو جميل و مفعم بالأمل و المشكلة اتحلت خلاص! , لا للأسف , اولاً السيارة ما كانت بإسم رجل , كانت بإسم انثى , فيما يبدو انه إسم أمها , و المشكلة الثانية , الاسم الثلاثي كان من غير لقب واضح , على سبيل المثال , فاطمة سليمان محمد , طيب اي خدمه! , من بيت مين الأخت! , طب جوزها من بيت مين؟ , يوووه شكلها رحلة البحث راح تطوّل , لمن اتجوزها راح انتقم , اتصلت على المعقب قلتله المعلومات دي مالها قيمة اذا ما عرفنا من بيت مين او رقم تلفونهم , طمنّي جزاه الله خير و قلي ما عليك راح ادورلك في شركة هيونداي نفسها عن معلومات اضافية

..............

قلت اتصرف انا كمان , طالما عندي اسم ثلاثي , صاحبنا أمين يشتغل في الاتصالات يمكن يقدر يوصل للرقم ,انا اعرف ان اذا عندي رقم ابغى اجيب اسم صاحبة شغلة سهله , بس هل العكس ممكن بالنسبة لرقم الجوال؟ , لا أعلم , اصلاً حتى لو جبنا رقم جوال امها ايش راح نسوي فيه؟ , مو معقول نتصل عمياني و نخطب , انا هدفي كان إننا نعرف من بيت مين عشان نسأل عن الناس أول , ربنا يجيب العواقب سليمة

..............

اللي عاجبني في المعقب ماشالله عليه انه متحمس , خصوصاً بعد ما قلتله السبب عن البحث , الله يقدرلنا على يده الخير , حالياً مستاء من نفسي ان كل عملية البحث بالنسبة ليا عبارة عن اتصالات و محمد بيتعب اكتر مني , بكرة يصادف انه جمعة نفس اليوم اللي شفتها فيه الاسبوع الماضي , راح احاول اروح جرير مول في نفس الوقت و ادوّر , عل و عسى يكونو بيتسوّقوا في نفس الوعد كل اسبوع

..............

و للحديث بقية