7- www.stc.com.sa

اخر شي وصلناله ان المعقب قدر يوصل لإسم صاحبة السيارة و رقم بطاقة الأحوال بس من غير لقب , و اتذكرت أمين صاحبي يشتغل في الاتصالات قلت يمكن يقدر يساعدني اجرب اتصل عليه

.....................

قبل لا اتصل على أمين , اتذكرت ويب سايت الاتصالات على الانترنت فيه خدمة الدليل , نفس اللي في 905 بس اون لاين , قلت خليني اجرب , ما اتوقعت انه بالروعة دي , البحث على نطاق المملكة كلها , و سريع , و نتائج دقيقة , فعلا دخلت الاسم الثلاثي اللي عندي , و ما كان فيه غير نتيجة وحده , رقم تلفون بيتهم! , انواع الحماس , لا و اللقب كمان! , طلعلي الاسم الرباعي , الظاهر ان امها مستقله بحياتها تماماً , السيارة و رقم التلفون بإسمها! , و اتأملت رقم التلفون , من الواضح جداً انه من الارقام الجديدة , يعني في المحمدية والاحياء المجاوره لنا , بدأت اتحمس اكتر , اتأملت اللقب , صراحة اول مره اسمع فيه في حياتي , حتى ما كنت عارف انطقه! , قلت خليني ابحث في الموقع عن اللقب يمكن اعرف هما من اي منطقة , الغريب في نتيجة البحث ان مافي احد في المملكه بنفس اللقب! , غريبة فعلاً , و في وسط متعة الاحساس بالنصر , باغتني السؤال , إيش راح اسوي برقم التلفون!

.....................

بصراحة الرقم ماله اي قيمة , زي ما قلت قبل كدا انا كنت ابغى اعرف اللقب أول , و مو لقب امها كمان لقب ابوها , عشان نسأل على الناس كويس , و نشوف اصلهم و فصلهم , بعدين ممكن نتصل ,الأم و طلع لقبها غريب , و رقم التلفون حتى ممكن ما يكون لهم اصلاً ,فكرت اتصل اشوف مين ممكن يرد , يمكن طويلة العمر [: , ولا يمكن الرقم ملغي ولا محذوف ولا مشبوك على فاكس ولا اي مصيبة

..................

اتصلت فعلاً , و قلبي يدق بعنف , سبحان الله من صغري اكره المعاكسه بالتلفون , لا و اخاف منها خوف مو طبيعي , ولا اعرف اتكلم و ارتبك , كالعادة اللي شجعني غرضي الشريف , شكلو ما راح يوديني في داهيه غير غرضي الشريف , إني واي , اتصلت و ردت عليا الشغالة , قلتلها بيت ابو سلطان! , ما فهمت طبعاً , قلتلها شكلي غلطان سوري و قفلت , على الاقل استفدت ان الرقم في الخدمه و انه رقم بيت فعلاً , و اغلب الظن انه رقمهم

.....................

نرجع لموضوع أمين , قلت عندي رقم الثابت يمكن يقدر يجبلي رقم الجوال , أو بالاصح يجبلي أرقام أخرى بنفس اللقب , مدري ايش راح استفيد منها بس احسن من ولا شي , بس قلت يمكن اقدر اوصل لعنوان البيت بالتحديد عن طريق رقم التلفون , والله و فعلاً , اتصلت على أمين باستحياء , اكره الناس اللي تطلب الخدمات دي , اخليه يستغل صلاحياته الوظيفية في اشياء غير مشروعة , بس كالعادة اللي شجعني اني ما بسوي شي غلط , طبعاً اضطريت احكية على الموضوع باختصار , قلي مافي مشاكل الموضوع سهل , بس اعطيني فرصه اروح الدوام و ارسلك المعلومات , و حالياً مستنيه يتصل و معاه اي معلومات جديدة

.....................

و اليوم يصادف الجمعة , مر اسبوع على يوم اللقاء , راح اقوم اصلي العشا , و انطلق على جرير مول ادوّر على السيارة , آخدلي لفتين في الحيّ , يعني ما عندي اي فكرة عن التصرف اللي راح اسويه لو شفتهم قدامي , مستحيل طبعاً اكلمهم ما عندي اي جرأه , بس برضه احسن من ولا شي , راح تجيني الافكار وقتها , و انشالله خير

.....................

و للحديث بقية