9- حيّ السلامة

و وصلني مسج من أمين أمس الساعة 2 فجراً , زي ما قلت سابقاً , ارسلتله قبل يومين اسم صاحبة السيارة اتوقع انه اسم امها و رقم بطاقة أحوالها , مع اني قدرت اجيب رقم تلفون بيتهم من دليل الهاتف في الانترنت , بس قلت يمكن أمين يقدر يوصل لمعلومات أكتر , الموقع ما اعطاني غير رقم واحد و اللقب ما كان واضح , و فعلاً أمين وصل لنفس المعلومات بالإضافة لإسم الحيّ , طلعو ساكنين في حيّ السلامة , و ليس في المحمدية , انا اتوقعت انهم في الحيّ اللي ورا جرير مول بحكم انهم كانو يقضّو للبيت من هناك , مجرد تخمين يعني ما كان يستند على شي

...................

ولكن أمين اعطاني خبر حلو , الاسبوع الجي راح يجبلي عنوان بيتهم بالتحديد عن طريق رقم تلفونهم بس مستني الفنيين يرجعوا من إجازة عيد الأضحى , حتى الآن الاخبار الطيبه جالسة تتوالى , ان شاء الله تستمر على هذا المنوال

...................

مع اني ما ادري ايش راح اسوي بعنوان البيت , بس الظاهر اني راح اكلّف محمد بالمهمة ديّ , يروح يسأل في المسجد اللي جمبهم ولا يتصرف , ماشالله عليه جرئ و يسويها , مع اني ملاحظ انو محمد لو كم يوم مختفي , الظاهر مافي جديد بحكم انو معظم الدوائر الرسمية مقفلة بسبب الإجازة , يالله كل تأخيرة فيها خيرة

...................

المشكلة حالياً ان الوقت مو في صالحي , الوالدة كلمت ناس سمعت عنهم انهم طيبين و من الكلام دا , لمن سألتني الماما قبل أسبوع تقريباً إنها راح تكلمهم , انا ما قلتلها لأ ولا قلتلها إيوا , برضو بحكم اني ما كان عندي أمل كبير اني الاقي أي معلومات عن فتاة جرير مول , بس دحين اتورطت لاني فعلاً لقيت معلومات كتير , و امي قيدها كلمت الأوادم , بركة قالولنا اعطونا وقت عشان الأولاد كلهم طالعين الحج و مدري مين تقربلهم ماتت , خلوها بعد الحج كدا بفترة و إنشالله خير , بركة عاد جات منهم , و لازم اتحرك في الوقت دا و اجمع اكبر قدر من المعلومات عشان اكلم أمي و انا يدّي مليانه على قولهم , الله ييسرها

...................

و للحديث بقية